ການຊື້ຂາຍຮຸ້ນ

ການບໍລິການຊື້ ຂາຍຮຸ້ນຂັ້ນພື້ນຖານ

• ຕ້ອງມີບັນຊີຊື້ ຂາຍຮຸ້ນກັບ ບໍລິສັດຫຼັກຊັບໃດໜຶ່ງທີ່ເປັນ ສະມາຊິກ ຕະຫຼາດຫຼັກຊັບລາວ (ຕລຊລ).
• ສະເພາະນັກລົງທຶນຕ່າງປະເທດຕ້ອງ ມີລະຫັດການຊື້ ຂາຍຫຼັກຊັບທີ່ອອກໃຫ້ໂດຍ ຕລຊລ, ເຊິ່ງນັກລົງທຶນສາມາດມອບສິດໃຫ້ແກ່ ບໍລິສັດຫຼັກຊັບ ຫຼື ທະນາຄານດູແລຊັບສິນ ເປັນຜູ້ດຳເນີນການແທນ.

• ເພື່ອເລີ່ມການຊື້ ຂາຍຮຸ້ນໃນ ຕລຊລ, ຜູ້ຊື້ຕ້ອງມີເງິນໃນບັນຊີທະນາຄານຮ້ອຍສ່ວນຮ້ອຍ (100%) ຂອງມູນຄ່າທີ່ຕ້ອງການຊື້ ແລະ ຜູ້ຂາຍຕ້ອງມີຮຸ້ນໃນບັນຊີຮຸ້ນຮ້ອຍສ່ວນຮ້ອຍ (100%) ຕາມຈໍານວນທີ່ຕ້ອງການຂາຍ.
• ນັກລົງທຶນ ສາມາດໂອນເງິນຈາກບັນຊີທະນາຄານ ໄປເຂົ້າບັນຊີຮຸ້ນຂອງຕົນ ເພື່ອເປັນເງິນວາງມັດຈຳລ່ວງໜ້າ ໂດຍລວມເອົາ ມູນຄ່າ ແລະ ຄ່າທຳນຽມໃນການຊື້ຢ່າງຄົບຖ້ວນ.
• ການສົ່ງຄຳສັ່ງຊື້ ຂາຍຮຸ້ນ, ນັກລົງທຶນສາມາດສົ່ງຄຳສັ່ງຜ່ານ 3 ຊ່ອງທາງຄື:

• -  ການສົ່ງຄໍາສັ່ງຊື້ ຂາຍຜ່ານການຂຽນແບບພິມ:

  ນັກລົງທຶນສາມາດສັ່ງຊື້ ຂາຍຮຸ້ນ ຜ່ານການຕື່ມຂໍ້ມູນໃສ່ແບບພິມ ທີ່ຫ້ອງຄ້າຫຼັກຊັບ ຂອງບໍລິສັດຫຼັກຊັບດ້ວຍຕົວເອງ.

  -  ການສົ່ງຄໍາສັ່ງຊື້ ຂາຍຜ່ານໂທລະສັບ ແລະ ອີເມວ

  ນັກລົງທຶນສາມາດສັ່ງຊື້ ຂາຍຮຸ້ນຜ່ານທາງໂທລະສັບ ແລະ ອີເມວ ໂດຍທີ່ນັກລົງທຶນສາມາດສົ່ງຄໍາສັ່ງຊຶ້ ຂາຍໄດ້ຈາກທຸກບ່ອນທີ່ມີສັນຍານມືຖື ແລະ ອິນເຕີເນັດ ໂດຍບໍ່ຈໍາເປັນຕ້ອງ ເຂົ້າໄປຫາບໍລິສັດຫຼັກຊັບ.

  -  ການສົ່ງຄໍາສັ່ງຊື້ ຂາຍຜ່ານທາງລະບົບອິນເຕິເນັດ:

  ນັກລົງທຶນສາມາດສົ່ງຄໍາສັ່ງຊື້ ຂາຍຜ່ານທາງລະບົບອິນເຕິເນັດ (Home Trading System ຫຼື HTS). ນັກລົງທຶນສາມາດດາວໂຫລດໂປຼແກມດັ່ງກ່າວນໍາເວັບໄຊຂອງ ບໍລິສັດຫຼັກຊັບ ເພື່ອຕິດຕັ້ງໃນຄອມພິວເຕີ (ພີຊີ ຫຼື ໂນດບຸກ) ແລະ ຂໍລະຫັດການນໍາໃຊ້ ໂດຍທີ່ນັກລົງທຶນສາມາດສົ່ງຄໍາສັ່ງຊຶ້ ຂາຍໄດ້ຈາກທຸກບ່ອນທີ່ມີສັນຍານອິນເຕີເນັດ.

ການຍົກເລີກຄຳສັ່ງ

• ນັກລົງທຶນສາມາດຍົກເລີກຄຳສັ່ງຊື້ ຫຼື ຄໍາສັ່ງຂາຍຂອງຕົນຖ້າຄຳສັ່ງດັ່ງກ່າວຍັງບໍ່ທັນຖືກຈັບຄູ່.
• ໃນການຍົກເລີກຄໍາສັ່ງຊື້ ຂາຍຮຸ້ນ ນັກລົງທຶນສາມາດສົ່ງຄຳສັ່ງຜ່ານພະນັກງານທີ່ຫ້ອງຄ້າຫລັກຊັບບໍລິສັດຫຼັກຊັບ, ໂທລະສັບ, ອີເມວ ແລະ ຜ່ານລະບົບຊື້ ຂາຍທາງອິນເຕິເນັດ.

ການບັນລຸການຊື້ ຂາຍ

• ລະບົບຈັບຄູ່ການຊື້ ຂາຍ ຂອງຕະຫຼາດຫຼັກຊັບລາວ ແມ່ນຕ້ອງໄດ້ນໍາໃຊ້ ຫຼັກການ ການຈັບຄູ່ຄໍາສັ່ງຊື້ ຂາຍ ທີ່ທາງ ຕລຊລ ວາງອອກ.

ສະຫຼຸບຜົນການຊື້ ຂາຍ

• ບໍລິສັດຫຼັກຊັບຈະແຈ້ງໃຫ້ນັກລົງທຶນຮັບຊາບໂດຍທັນທີ ທີ່ຄຳສັ່ງຊື້-ຂາຍຂອງນັກລົງທຶນໄດ້ມີການຈັບຄູ່ ຕາມຊ່ອງທາງຕິດຕໍ່ສື່ສານຕ່າງໆທີ່ໄດ້ຕົກລົງກັນໄວ້.

  ໝາຍເຫດ:

  ສຳລັບຂໍ້ມູນເພີ່ມຕື່ມ ກະລຸນາຕິດຕໍ່ບໍລິສັດຫຼັກທີ່ທ່ານໄດ້ເປີດບັນຊີນໍາ.

ການຊໍາລະສະສາງ

• ຕລຊລ ຈະດໍາເນີນການຊໍາລະເງິນ ແລະ ສົ່ງມອບຫຼັກຊັບສຸດທິຂອງທຸລະກໍາທີ່ມີການຊື້ ຂາຍທັງໝົດ (netting).

ການຮັບຝາກ

• ຕ້ອງມີການຝາກຫຼັກຊັບໄວ້ກັບ ຕະຫຼາດຫຼັກຊັບລາວ (ສູນຮັບຝາກຫຼັກຊັບ).

ພາບລວມການຊື້ ຂາຍຫຼັກຊັບ