ການຄຸ້ມຄອງບໍລິສັດ

  ອົງປະກອບທີ່ສຳຄັນໃນການສົ່ງເສີມຄວາມສຳເລັດຂອງການພັດທະນາ ແລະ ເຊື່ອມໂຍງເສດຖະກິດກັບ ພາກພື້ນ ແມ່ນຕິດພັນກັບກຳນົດມາດຕະຖານ, ກົນໄກ,ນະໂຍບາຍ ແລະ ແນວທາງຈັດຕັ້ງປະຕິບັດ ທີ່ຖືກຕ້ອງ, ຈະແຈ້ງ ແລະ ຮັດກຸມ. ສຳລັບ ສປປ ລາວ ການພັດທະນາຕະຫຼາດຫຼັກຊັບທີ່ມີປະສິດທິພາບ, ເຂັ້ມແຂງ ແລະ ໂປ່ງໃສຍິ່ງຂຶ້ນ ແມ່ນຮຽກຮ້ອງການຄຸ້ມຄອງບໍລິຫານທີ່ດີເຂົ້າມາມີບົດບາດ ເພື່ອຈະຊ່ວຍເພີ່ມຄວາມເຊື່ອໝັ້ນໃຫ້ແກ່ຜູ້ມີສ່ວນຮ່ວມໃນຕະຫຼາດ ແລະ ສາມາດສ້າງຜົນຕອບແທນ ແລະ ເພີ່ມມູນຄ່າໄລຍະຍາວໃຫ້ກັບຜູ້ຖືຮຸ້ນ.
 ສຳນັກງານຄະນະກຳມະການຄຸ້ມຄອງຫຼັກຊັບ ແລະ ຕະຫຼາດຫຼັກຊັບລາວ ເຫັນໄດ້ເຖິງຄວາມສຳຄັນຂອງວຽກງານການຄຸ້ມຄອງບໍລິຫານ (Corporate Governance: CG) ຕໍ່ກັບການພັດທະນາແບບຍືນຂອງບໍລິສັດຈົດທະບຽນ. ສະນັ້ນ, ຈຶ່ງໄດ້ຄົ້ນຄວ້າ ແລະ ຖອດຖອນບົດຮຽນກ່ຽວກັບການຄຸ້ມຄອງບໍລິຫານຂອງບັນດາປະເທດໃນພາກພື້ນ ແລະ ສາກົນ ໂດຍສົມທົບກັບ ອົງການການເງິນສາກົນ (IFC) ນຳເອົາບັນດາຫຼັກການຄຸ້ມຄອງບໍລິຫານທີ່ດີ ມານຳໃຊ້ ແລະ ສ້າງ “ຄຳແນະນຳ ວ່າດ້ວຍການຄຸ້ມຄອງບໍລິຫານສຳລັບບໍລິສັດຈົດທະບຽນໃນຕະຫຼາດຫຼັກຊັບ” ຂຶ້ນມາເພື່ອເປັນແນວທາງໃນການຈັດຕັ້ງປະຕິບັດໃຫ້ແກ່ບໍລິສັດຈົດທະບຽນ ແນ່ໃສ່ຍົກລະດັບຄຸນນະພາບການຄຸ້ມຄອງບໍລິຫານຂອງບໍລິສັດຈົດທະບຽນ ໃຫ້ສອດຄ່ອງກັບມາດຕະຖານຂອງປະເທດໃນພາກພື້ນ ແລະ ສາກົນຂຶ້ນເທື່ອລະກ້າວ ໂດຍອີງໃສ່ຫຼັກການຄຸ້ມຄອງບໍລິຫານຂອງອົງການພັດທະນາ ແລະ ຮ່ວມມືທາງດ້ານເສດຖະກິດ (G20/OECD) ແລະ ຫຼັກການປະເມີນການຄຸ້ມຄອງບໍລິຫານຂອງສະມາຄົມບັນດາປະເທດອາຊີຕະເວັນອອກສຽງໃຕ້ (ASEAN Corporate Governance Score-card).
 ການຄຸ້ມຄອງບໍລິຫານອົງກອນທີ່ດີ ຈະຊ່ວຍປັບປຸງຜົນການດຳເນີນງານຂອງບໍລິສັດ, ສ້າງສະພາບແວດລ້ອມການລົງທຶນທີ່ເອື້ອອຳນວຍ ແລະ ປະກອບສ່ວນເຂົ້າໃນການພັດທະນາຕະຫຼາດທຶນ ແລະ ແບບຍືນຍົງ. ນອກຈາກນັ້ນ, ການປະຕິບັດການຄຸ້ມຄອງບໍລິຫານອົງກອນທີ່ດີ ຈະຊ່ວຍໃຫ້ບໍລິສັດ ເຄື່ອນໄຫວວຽກງານ ຢ່າງມີປະສິດທິພາບ, ໂປງໃສ ແລະ ຍຸດຕິທຳ. ພ້ອມນັ້ນ, ບໍລິສັດທີ່ມີລະບົບການຄຸ້ມຄອງບໍລິຫານທີ່ດີ ຈະສ້າງຄວາມເຊື່ອໝັ້ນໃຫ້ແກ່ຜູ້ລົງທຶນ ແລະ ດຶງດູດການລົງທຶນຈາກພາຍໃນ ແລະ ຕ່າງປະເທດ ໄດ້ຫຼາຍຂຶ້ນ.